Amrani, umunyamabanga wa CAF yeguye ku mirimo

Umunyamabanga w’impuzamashyirahamwe y’umupira w’amaguru muri Afurika, CAF, Hicham El Amrani yamaze kwegura kuri uyu mwanya nyuma y’iminsi mike Issa Hayatou atsinzwe mu matora yo gukomeza kuyobora iyi mpuzamashyirahamwe.

El Amrani yandikiye amashyirahamwe ya ruhago ku mugabane wa Afurika kuri iki Cyumweru, avuga ko asezeye,ariko ntiyagaragaza impamvu yo kwegura kuri iyi mirimo.
Uyu mugabo w’imyaka 37 ukomoka muri Maroc, yari amaze imyaka 6 ku bunyamabanga bwa CAF ndetse asezeye nyuma y’iminsi 10 gusa uwari Perezida wa CAF, Issa Hayatou atsindiwe amatora muri Ethiopia.
Nyuma yo gutsindwa na Ahmad Ahmad ku matora y’ubuyobozi bwa CAF, abakoranaga na Issa Hayatou bagera kuri 6 bakaba bamaze kuva ku mirimo bakoraga.
Biteganyijwe ko perezida mushyawa CAF, Ahmad Ahmad azahura n’abagize inama y’ubuyobozi ya CAF i Cairo kuri uyu wa Mbere taliki ya 27 Werurwe 2017.