POLICE FC yihanije AS Kigali

Mu mukino wabimburiye iyindi y’umunsi wa 14 wa shampiyona kuri uyu wa Gatanu, ikipe ya Police FC inyagiye AS Kigali ibitego 3-0, inayitwara umwanya wa gatatu ku rutonde rwa shampiyona.
Amakipe yombi yagiye muri uyu mukino atandukanywa n’inota rimwe, aho ikipe ya AS Kigali yari imbere n’manota 26.

Ibitego bya Songa Isaie ku munota wa 40 w’umukino, Mico Justin mu minota y’inyongera y’igice cya mbere ndetse n’agashinguracumu ka Danny Usengimana ku munota wa 84 w’umukino, bikaba bihesheje Police FC intsinzi kuri uyu munsi.
umusore Danny Usengimana akaba yahise ananganya ibitego 11 na Sashir Nahimana wa Rayon Sports bakaba bari kumwanya wa mbere.
Nyuma yo gutsinda uyu mukino, Police FC ikaba igize amanota 28 ku mwanya wa gatatu, amanota abiri inyuma ya APR FC ya kabiri ndetse n’amanota 5 inyuma ya Rayon Sports ya mbere, aho aya makipe yombi agomba guhura kuri uyu wa Gatandatu.